भारतीय अनुदानमा कलेज नेपाललाई हस्तान्तरण

काठमाडौंमा भारतीय अनुदानमा बनेको मदन भण्डारी मेमोरियल कलेजको भवन भारत सरकारले यसै साताको सुरुमा काठमाडौं कलेज व्यवस्थापन समितिलाई हस्तान्तरण गरेको छ । सोमबार नेपालका लागि भारतीय राजदूत नवीन श्रीवास्तवको अध्यक्षतामा भएको उक्त हस्तान्तरण समारोहमा नेपालका पूर्वपरराष्ट्रमन्त्री महेन्द्रबहादुर पाण्डे, कलेज व्यवस्थापन समितिकी अध्यक्ष उषा किरण भण्डारी, भण्डारी फाउण्डेसन र काठमाडौं जिल्ला समन्वय समितिका अध्यक्ष सन्तोष बुढाथोकीको उपस्थिति रहेको थियो ।

‘नेपाल–भारत विकास सहयोग’ कार्यक्रमअन्तर्गत रु २८ करोड ६४ लाखको लागतमा उक्त आयोजना उच्च प्रभाव सामुदायिक विकास आयोजनाका रूपमा विकास गरिएको नेपालस्थित भारतीय दूतावासले जनाएको छ ।

कलेजले स्थापनाकालदेखि नै उच्चस्तरको शिक्षा प्रदान गर्दै आएको छ । यसमा देशभरका विभिन्न जिल्लाका १५०० भन्दा बढी विद्यार्थी छन् र त्रिभुवन विश्वविद्यालयसँग आबद्ध छन्। यसले पाठ्यक्रमहरूको एक विस्तृत श्रृंखला पनि प्रदान गर्दछ।

नेपालस्थित भारतीय दूतावासले उपलब्ध गराएको तथ्यांकअनुसार सन् २००३ यता भारतले नेपालमा ५ सय ३५ भन्दा बढी उच्च प्रभाव सामुदायिक विकास आयोजनाहरू सञ्चालन गरेको छ जसमध्ये ४ सय ७८ वटा सम्पन्न भएका छन् । जसमध्ये १०४ आयोजना वाग्मती प्रदेशमा छन् भने ४० वटा काठमाडौं जिल्लामा छन् ।

ती बाहेक भारत सरकारले काठमाडौंका अस्पताल, स्वास्थ्य क्लिनिक र शैक्षिक संस्थालाई ६८ वटा एम्बुलेन्स र ४६ वटा स्कुल बस उपलब्ध गराएको थियो, जसमध्ये एउटा यस कलेजलाई दिइएको थियो । भारतीय दूतावासले यस परियोजनाको कार्यान्वयनले शैक्षिक सुविधाको विकास गरी आफ्ना जनताको उत्थानका लागि नेपाल सरकारको पहललाई समर्थन गर्न भारत सरकारको निरन्तर समर्थनलाई देखाएको छ।