भारत संयुक्त राष्ट्र संघको सामाजिक विकास आयोगको अध्यक्ष

संयुक्त राष्ट्र संघको आर्थिक तथा सामाजिक परिषद्को सामाजिक विकास आयोगको ६२ औं सत्रको अध्यक्षको रूपमा भारत निर्वाचित भएको छ। बुधवार न्यूयोर्कमा संयुक्त राष्ट्रको मुख्यालयमा भएको संयुक्त राष्ट्र संघको आर्थिक तथा सामाजिक परिषद् बैठकमा भारत सर्वसम्मतिले निर्वाचित भएको थियो।

सन् १९७५ पछि भारतले पहिलो पटक यस आयोगको अध्यक्षता पाएको बताइएको छ । संयुक्त राष्ट्र संघका लागि भारतकी स्थायी प्रतिनिधि रुचिरा कम्बोजले यो जिम्मेवारी सम्हाल्ने छिन् ।

संयुक्त राष्ट्र संघका लागि भारतका स्थायी प्रतिनिधि राजदूत कम्बोजले भने, “प्रधानमन्त्री मोदीको दूरदर्शी नेतृत्वमा भारतले गरिबी निवारण र सामाजिक-आर्थिक विकासमा उल्लेखनीय सफलता हासिल गरेको छ। यस आयोगको अध्यक्षको रूपमा चयन हुनु भनेको भारतको अथक विकास प्रगतिको अन्तर्राष्ट्रिय मान्यताको अभिव्यक्ति हो।" यस आयोगको कामलाई भारतले सदैव महत्व दिएको बताउँदै उहाँले आयोगको सदस्यका हैसियतले हाम्रा असल अभ्यासहरू साझा गरी सामाजिक–आर्थिक विकासको क्षेत्रमा अन्तर्राष्ट्रिय सहयोग अभिवृद्धि गर्न हरसम्भव प्रयास गर्ने बताउनुभयो ।

सामाजिक विकासका लागि ४६ सदस्यीय आयोग संयुक्त राष्ट्र संघको आर्थिक तथा सामाजिक परिषद्लाई सामाजिक नीतिमा सल्लाह दिने प्रमुख राष्ट्रसंघीय निकायहरू मध्ये एक हो।